عارفه يامه
انا حاسس ان الموت
ماخدتش منك
غير الطرحه
والجلابيه السوده
ما انا كل ما اعدي
جنب الاوضه
اسمع صوتك..
وانتى بتضحكى ع الدني
اوبتدعي لى ...
روح.. ربنا معاك..
ها تسافر..
وهاترجع مجبور الخاطر
وها استناك...
طب اسندى على كتفى
بكره تقومي
بكره تخًفى
عارف مين يا ابنى
بيقع ويقوم
اوعى تدور ع الدفا
فى فلوس وهدوم
ومتنساش تحوش شويه
اصحاب..
وافرح اووى..
لما يدق الباب
وتلاقى حد بيحضنك
لوجه الله...
ياه
فاكره يامه لما كنتي
تعملى بصاره
وتدى منها لابله سارة
يرجع ف الطبق رز باللبن
يروح لام حسين..
يرجع صنيه بسيسه
تدى منها لخالتى بيسه..
يرجع الطبق مليان حب
معقوله فيه كده قلب..!
عارفه يامه
النهارده بقيت بخاف بجد
بخاف من اى حاجه
ومن اى حد..
بخاف غصب عني
اتخبط فى حد
او اطلب من حد يسال علي
لحسن يعمل محضر..
ويرفع قضيه
ويطلب تعويض
من اول هنا يامه
لازم نبدا من جديد
هو الفرح ليه يامه
شكله لسه بعيد؟؟
ادعى لى يامه
2 comments:
ربنا يا بنى ينورلك طريقك
ومن بين كل الجواهر تلاقى صديقك
وروح والدتك عايشه جوانا ووسطنا
ولما بتلقى الطيبين يبقى دعوه أمك أستجابت من قبلنا وبعدنا
قلوبنا دايما معاك حتى فى البعاد
وهنقرا الفاتحه لوالدتك ولأموات المسلمين فى كل وقت ومعاد
والروح بتفارق الجسد اه
لكن السيره الطيبه وجمال الروح بيفضل صداه
أسمحلى اهديلك الكلمات ديه
على فكره وحشتنى موضوعاتك وانت كمان وحشتنى
على فكره انا فعلا بحس بكده لما جدى اتوفى
لما كنت بعدى من قدام باب اودته
كنت بحس بوجوده وبسمع انفاسه وبحس انه هينده عليا ويقولى اعملى قهوه
وكنت بحس برهبه غريبه وانا قدام الباب
بس فعلا الروح بتصعد فى السما عند ربها
لكن بتفضل الروح حوالينا بنشم عبيرها الطيب
وبنفتكره دايما بكل خير
تحياتى ليك يا جدي
انا قلقان عليك جدا
ياريت تطمنا عليك
لعل مانع ظهورك خيرا
Post a Comment