بداية ونهاية ......شعر للابن الحبيب زيزو

كانت بداية..زي أي حلم لسه متبناش
كتير نخاف.. وكتير نحزن والحلم برضه منتهاش
أيام كتير عدت أوهام ..ورحنا وجينا وخدنا الزمان
وبرضه جوانا الحلم عاش
كان كل كف يلاقي نفسه ف كف تاني
كان كل همس شايل وعوده والأماني
وعدت ليالي طوال.. وفجأه وقف المشوار
كلمه واحده جابت كل الكلام
وكانت نهاية
زي أي قصه بتنتهي..زي أي شمعه بتنطفي
مبيفضلش منها غير حبة سراب
حبة ألم ..حبة عتاب
فاتت سنين عدت بسرعة جهنمية
كل واحد فينا راح ف دنيا تانيه
ويوم ما أتلاقينا كان كل كف ف كف تانيه
وعيوننا بصت لورا..ورمشت بسرعة
ودارينا دمعه..
ودارينا أهه جوه قلب بيتحرق
كل ده شفناه ف لحظه ولسه العمر بيتسرق
في ناس أتكتب عليها تعيش العمر شقيانه
وناس كتير تلف ف دايره واحده حيرانة
ويعدي بينا العمر وسؤالنا جواناعشنا الحياه ولا عاشتنا ؟؟
دقنا مرارتها ولا حلاوتها ؟؟
حبنا كان وهم ولا حقيقه هربانه
رايحه وسيبانا..وأطوت صفحه كتاب
أخر صفحه ف الكتاب
وكانت نهايه..